Framtakssjóðurinn Horn IV slhf. hefur gengið frá kaupum á hlut í fyrirtækinu S4S ehf. sem rekur verslanirnar Steinar Waage, Kaupfélagið, Ecco, Skechers og Toppskóinn, ásamt AIR verslununum og Ellingsen í Reykjavík og á Akureyri. Dótturfélag fyrirtækisins er S4S tæki ehf. sem rekur tækjasölu og verkstæði BRP Ellingsen. Velta samstæðunnar árið 2021 voru tæpir fimm milljarðar króna.
· Árið 2021 besta rekstrarár S4S frá stofnun.
· Félagið hyggst vaxa með innri og ytri vexti.
· Markmið um skráningu á næstu árum.
Eftir viðskiptin mun Horn IV eiga 22% hlut í félaginu, en við kaupin voru annars vegar keyptir hlutir af núverandi hluthöfum og hins vegar var hlutafé hækkað og skrifaði Horn IV sig fyrir allri þeirri hækkun. Eftir sem áður eru Pétur Þór Halldórsson, forstjóri félagsins, og Sjávarsýn ehf., eignarhaldsfélag Bjarna Ármannssonar, stærstu hluthafar félagsins.
Félagið hefur vaxið mikið á undanförnum árum og þá sérstaklega í netverslun, en S4S rekur netverslanirnar S4S.is, Skór.is, Ellingsen.is, Air.is, BRP.is og Rafhjólasetur.is. Nýlega opnaði félagið nýja verslun í Smáralind sem þjónustar netverslunarhluta fyrirtækisins. Stefnt er að áframhaldandi vexti félagsins og fyrirhugað er að skrá það á hlutabréfamarkað innan fárra ára.
„Við hjá S4S erum mjög ánægð með þessa niðurstöðu og hlökkum til að starfa með Horni IV að áframhaldandi uppbyggingu og rekstri félagsins. S4S byggir á rótgrónum og traustum grunni íslenskra verslana sem bjóða uppá gæða vörumerki í skóm, fatnaði, útivistarvörum og ferðatækjum.
Saman hafa þessar einingar náð góðum árangri, sérstaklega síðustu fimm ár með innri og ytri vexti. Lykillinn að þessum árangri er dugnaður og þrautseigja okkar starfsfólks sem leggur sig fram alla daga við að veita viðskiptavinum okkar framúrskarandi þjónustu. Sömuleiðis höfum við átt og munum áfram eiga í góðu samstarfi við okkar birgja.
Við ætlum að vaxa enn frekar, styrkja innviði fyrirtækisins og halda þannig áfram að veita viðskiptavinum okkar frábæra þjónustu. Horn framtakssjóður er góður ferðafélagi fyrir okkar vegferð og mun hann leggja sitt af mörkum við að styrkja og efla starfsemi félagsins enn frekar á jákvæðan hátt fyrir fyrirtækið í heild, starfsfólk þess og viðskiptavini,“ segir Pétur Þór Halldórsson forstjóri S4S.
Horn IV er 15 milljarða framtakssjóður í rekstri Landsbréfa sem fjárfestir í óskráðum íslenskum fyrirtækjum með góða rekstrarsögu. Auk þess er lögð áhersla á að fyrirtæki sem sjóðurinn fjárfestir í tileinki sér sjálfbærni og samfélagslega ábyrgð í starfsemi sinni og mun sjóðurinn styðja félögin í að ná umbótum á sviði UFS-þátta. Sjóðurinn hóf starfsemi á árinu 2021 og er þetta önnur fjárfesting sjóðsins en fjárfestingartímabil hans er til loka júlí 2025.
„S4S er leiðandi fyrirtæki á smásölumarkaði og rekstur félagsins traustur. Framtíðarsýn S4S er skýr og hefur félagið náð mjög góðum árangri í að aðlagast breyttri kauphegðun líkt og aukin netsala félagsins ber vitni um. S4S býr yfir reynslumiklu og öflugu starfsfólki, sterkum innviðum auk fjölda vel staðsettra verslana með þekkt vörumerki. Fram undan eru spennandi tímar og hlökkum við til samstarfsins við hluthafa og starfsfólk félagsins og teljum að nýtt hlutafé muni styrkja S4S enn frekar á vegferð komandi ára,“ segja fjárfestingastjórar Horns IV.
Fjármálaráðgjöf Deloitte hafði umsjón með söluferlinu og fyrirtækjaráðgjöf Arion banka var ráðgjafi kaupanda.
