Upplýsingagjöf tengd sjálfbærni á sviði fjármálaþjónustu

Landsbréf hafa sett sér stefnu um ábyrgar fjárfestingar og sjálfbærniáhættu sem skilgreinir hvernig horft er til sjálfbærniþátta við fjárfestingarákvarðanir og hvernig tekið er mið af sjálfbærniáhættu eftir því sem við á miðað við eðli og fjárfestingarstefnu hvers sjóðs. Upplýsingar um flokkun einstakra sjóða Landsbréfa samkvæmt reglugerð um upplýsingagjöf tengda sjálfbærni á sviði fjármálaþjónustu (SFDR) koma fram í gögnum viðkomandi sjóðs. Flestir sjóðir Landsbréfa falla undir 6. gr. SFDR en Landsbréf - Eignadreifing sjálfbær hs. fellur undir 8. gr. SFDR.

Sjálfbærniáhætta er atburður eða ástand á sviði umhverfismála, félagslegra þátta eða stjórnarhátta sem gæti, ef hann gerist, haft raunveruleg eða hugsanleg veruleg neikvæð áhrif á verðmæti fjárfestinga. Sjálfbærniáhætta getur meðal annars tengst loftslagsbreytingum, náttúru og auðlindum, félagslegum þáttum og stjórnarháttum fyrirtækja. Við greiningu og mat á fjárfestingarkostum er horft til umhverfisþátta, félagslegra þátta og stjórnarhátta (UFS). Landsbréf framkvæma UFS-áhættumat á útgefendum og geta jafnframt stuðst við greiningar þriðja aðila. UFS-mat er einn þeirra þátta sem geta haft áhrif á heildarmat á áhættu og fjárfestingarkostum. Umfang og aðferð við matið getur verið mismunandi eftir fjárfestingarstefnu, eignaflokkum, eðli fjárfestinga og aðgengi að upplýsingum. Við erlendar fjárfestingar í sjóðum fer fram áreiðanleikakönnun þar sem meðal annars er lagt mat á hvernig tekið er mið af sjálfbærniþáttum og sjálfbærniáhættu í fjárfestingarferli þeirra. Þetta á þó ekki við um vísitölusjóði með sama hætti þar sem ekki er um virka eignastýringu er að ræða. Þótt horft sé til sjálfbærniáhættu við fjárfestingarákvarðanir þýðir það ekki að sjóður efli umhverfislega eða félagslega þætti eða hafi sjálfbærar fjárfestingar að markmiði í skilningi 8. eða 9. gr. SFDR.

Loftslagsáhætta er undirþáttur sjálfbærniáhættu. Landsbréf framkvæma reglubundið mat á loftslagsáhættu og tækifærum í eignasöfnum sjóða þar sem meðal annars er lagt mat á umbreytingaráhættu og raunlæga áhættu með hliðsjón af mismunandi framtíðarsviðsmyndum. Mat Landsbréfa er að raunlæg loftslagsáhætta í eignasöfnum sjóða sé almennt tiltölulega lág til skamms tíma en geti aukist til meðallangs og langs tíma, einkum ef aðgerðir til að draga úr loftslagsbreytingum ganga hægar en gert er ráð fyrir eða skila ekki tilætluðum árangri. Umbreytingaráhætta getur hins vegar komið fyrr fram, meðal annars vegna breytinga á regluverki, tækni, markaðsaðstæðum og hegðun og viðhorfum markaðsaðila. Slíkar breytingar geta haft áhrif á fjármálamarkaði og verðmæti eigna sjóða. Áhættustýring fylgist með sjálfbærniáhættu í rekstri sjóða og gerir grein fyrir henni í reglubundinni skýrslugjöf.

Stefna Landsbréfa um ábyrgar fjárfestingar og sjálfbærniáhættu

Stefna Landsbréfa um ábyrgar fjárfestingar og sjálfbærniáhættu í tengslum við fjárfestingaráðgjöf

Með lögum nr. 25/2023, um upplýsingagjöf tengda sjálfbærni á sviði fjármálaþjónustu, voru innleiddar tvær reglugerðir Evrópusambandsins, annars vegar flokkunarreglugerðin (e. EU Taxonomy) og hins vegar upplýsingagjöf um sjálfbærni á sviði fjármálaþjónustu (hér eftir SFDR).

Samkvæmt 4. gr. SFDR ber aðilum á fjármálamarkaði eins og þeir eru skilgreindir í reglugerðinni að birta á vefsíðum sínum, eftir því sem við á, uppfærðar upplýsingar um að hvaða leyti tekið er tillit til neikvæðra áhrifa fjárfestinga á sjálfbærniþætti. Umfang upplýsinganna miðast við stærð og eðli starfseminnar og tegundir fjármálaafurða. Undir neikvæð áhrif fjárfestingarákvarðana á sjálfbærniþætti falla þau neikvæðu áhrif sem fjárfesting eða fjárfestingarráðgjöf hefur á sjálfbærniþætti eins og þeir eru skilgreindir í SFDR.

Í þeim tilgangi að tryggja samanburðarhæfi upplýsinga milli aðila á fjármálamarkaði voru með framseldri reglugerð (ESB) nr. 2022/1288 við SFDR settir fram tæknilegir eftirlitsstaðlar um atriði sem varða efni og framsetningu upplýsinganna í tengslum við meginregluna um „að valda ekki verulegu tjóni“ o.fl. Gerðin var innleidd með reglum Seðlabanka Íslands um upplýsingagjöf tengdri sjálfbærni á sviði fjármálaþjónustu, nr. 1023/2024.

Yfirlýsingu um helstu neikvæðu áhrif fjárfestingarákvörðunar á sjálfbærniþætti er ætlað að veita upplýsingar um hvernig Landsbankinn og Landsbréf bera kennsl á, mæla og bregðast við neikvæðum áhrifum sem fjárfestingarákvarðanir kunna að hafa á sjálfbærniþætti. Með sjálfbærniþáttum er átt við umhverfismál, félagslega þætti og mannauðsmál, virðingu fyrir mannréttindum og málefni sem varða spillingu og mútur. Með því að taka tillit til neikvæðra áhrifa fjárfestinga á sjálfbærniþætti leggur bankinn sitt af mörkum til að auka langtíma jákvæða afkomu viðskiptavina sinna sem stuðlar að sjálfbærari efnahag og samfélagi.

Yfirlýsing um neikvæð áhrif fjárfestingarákvarðana á sjálfbærniþætti / Summary - Statement on principal adverse impacts of investment decisions on sustainability factors

PCAF skýrsla Landsbréfa

Starfskjarastefna Landsbréfa er árlega samþykkt á aðalfundi félagsins. Starfskjarastefnan settur almennan ramma um starfskjör í Landsbréfum og er þar meðal annars kveðið á um að starfskjör skuli ekki stuðla að óhóflegri áhættutöku að því er varðar áhættu tengda sjálfbærni.

Starfskjarastefna Landsbréfa

Landsbréf geta beitt takmörkunum í fjárfestingarferli sjóða þegar mat á sjálfbærniþáttum leiðir í ljós veruleg neikvæð áhrif af starfsemi útgefanda á umhverfislega eða félagslega þætti eða verulega annmarka á stjórnarháttum, einkum ef ekki er unnið að úrbótum með trúverðugum hætti. Við erlendar fjárfestingar er almennt ekki fjárfest í sjóðum með virkri stýringu sem taka ekki, eða taka aðeins að takmörkuðu leyti, mið af sjálfbærniþáttum og sjálfbærniáhættu í fjárfestingarferli sínu.

Sjóðir Landsbréfa fjárfesta ekki í fyrirtækjum sem framleiða eða hafa tekjur af framleiðslu umdeildra vopna og í fyrirtækjum sem hafa umtalsverðar tekjur af umdeildri atvinnustarfsemi svo sem framleiðslu á tóbaki, vopnum, klámi eða kolum. Með umtalsverðum tekjum er hér átt við fyrirtæki sem rekja meira en 5% tekna sinna til umdeildrar atvinnustarfsemi. Ef sjóður sem Landsbréf fjárfesta í á eignir í fyrirtækjum sem eru  á skimunarlista Landsbréfa er viðkomandi sjóður tekinn til skoðunar og metið hvort eignarhaldið samræmist viðmiðum Landsbréfa um ábyrgar fjárfestingar.

Landsbréf geta jafnframt beitt takmörkunum ef útgefandi  gerist ítrekað brotlegur gegn landslögum, alþjóðalögum, samningum sem Ísland hefur fullgilt eða öðrum viðurkenndum viðmiðum sem Landsbréf líta til við ábyrgar fjárfestingar. Í slíkum tilvikum er almennt leitast við að eiga samskipti við útgefanda og stuðla að úrbótum áður en til útilokunar kemur. Útilokun kann þó að vera beitt án undangenginna samskipta þegar eðli starfseminnar, alvarleiki brots eða fyrirfram skilgreind útilokunarviðmið gefa tilefni til þess.

Sjálfbærninefnd Landsbréfa tekur ákvarðanir um takmarkanir og útilokun að undangenginni greiningu á fyrirliggjandi upplýsingum, þ.m.t. innra mati Landsbréfa og gögnum utanaðkomandi greiningaraðila og gagnaveitna.Hafi útgefandi gripið til fullnægjandi úrbóta getur nefndin ákveðið að fella útilokun úr gildi."

Nasdaq UFS - tafla Landsbréfa 2025