Landsbréf hf. hafa birt ársreikning vegna ársins 2024.
Helstu niðurstöður eru þessar:
- Hagnaður af rekstri Landsbréfa á árinu 2024 nam 1.272 milljónum króna eftir skatta, samanborið við um 1.035 milljónir á árinu 2023.
- Hreinar rekstrartekjur á árinu 2024 námu 2.717 milljónum króna, samanborið við 2.405 milljónir króna á árinu 2023.
- Eigið fé í árslok 2024 var 4.390 milljónir króna samanborið við 4.118 milljónir króna í árslok 2023.
- Í lok ársins voru eignir í stýringu samtals um 543 milljarðar króna samanborið við 472 milljarða króna árið áður.
- Í lok árs voru 22 stöðugildi hjá Landsbréfum, en ársverkin voru 21,6.
Helgi Þór Arason, framkvæmdastjóri Landsbréfa:
„Árið 2024 var farsælt í rekstri Landsbréfa og ávöxtun sjóða almennt góð að teknu tilliti til markaðsaðstæðna og þá sérstaklega í samanburði við samkeppnisaðila. Verðbólga tók að hjaðna þegar leið á árið og Seðlabanki Íslands hóf vaxtalækkunarferli sitt. Síðustu mánuðir ársins reyndust sérlega hagfelldir á innlendum hlutabréfamarkaði og nutu hlutabréfasjóðir Landsbréfa og eignadreifingarsjóðir góðs af því. Væntingar um lækkandi verðbólgu og áframhaldandi vaxtalækkanir gefa fyrirheit um gott yfirstandandi ár á mörkuðum og þar með fyrir sjóði Landsbréfa, þó ýmsir óvissuþættir geti aukið sveiflur á mörkuðum og þá einkum ýmis alþjóðleg óvissa, bæði austan hafs og vestan. Það eru einnig krefjandi tímar í hagstjórn hér á landi og mikilvægt að þeir sem völdin hafa taki ábyrg skref í átt að áframhaldandi hagsæld. Við hjá Landsbréfum tökum alvarlega það hlutverk að ávaxta sparifé landsmanna og erum þakklát fyrir það traust sem þúsundir sjóðafélaga hafa sýnt Landsbréfum og heitum því að vinna áfram með hag þeirra að leiðarljósi.“
