Stjórnarhættir

I. Nafn félags, heimili og tilgangur

1. gr.

Félagið er hlutafélag og er nafn þess Landsbréf hf. Heimilisfang félagsins og varnarþing er að Reykjastræti 2, Reykjavík.

2. gr.

Tilgangur félagsins er rekstur verðbréfasjóða, fjárfestingarsjóða og annarra sérhæfðra sjóða, eignastýring og önnur starfsemi sem fellur undir starfsleyfi félagsins samkvæmt 27. gr. laga nr. 161/2002, um fjármálafyrirtæki, fjárfestingar og lánastarfsemi innan þess ramma sem lög leyfa.

II. Hlutafé félagsins

3. gr.

Hlutafé félagsins er kr. 35.000.000. Hver hlutur er að fjárhæð 1 kr. (ein króna) að nafnvirði. Engar skorður eru reistar við heimild hluthafa til meðferðar á hlutum sínum og engin forréttindi fylgja neinum hlut. Hluthafar þurfa ekki að sæta innlausn hluta sinna nema lög standi til annars.

4. gr.

Heimilt er að hækka hlutafé félagsins með ályktun hluthafafundar og þarf til sama magn atkvæða og til breytinga á samþykktum þessum. Stjórn félagsins skal ákveða nafnverð nýrra hluta, útboðsgengi og greiðslukjör. Hluthafar skulu hafa forkaupsrétt að öllum nýjum hlutum í hlutfalli við skráða hlutafjáreign sína. Hluthafafundur einn getur ákveðið lækkun hlutafjár.

5. gr.

Stjórn félagsins skal halda hlutaskrá samkvæmt lögum. Gagnvart félaginu skoðast hlutaskrá sem fullgild sönnun fyrir eignarrétti að hlutum í félaginu og skal arður á hverjum tíma, svo og allar tilkynningar, sendast þeim sem skráður er eigandi viðkomandi hlutar í hlutaskrá félagsins.

6. gr.

Stjórn félagsins hefur forkaupsrétt fyrir félagsins hönd að fölum hlutum. Að félaginu frágengnu hafa hluthafar forkaupsrétt að hlutum í hlutfalli við hlutafjáreign sína. Verði ágreiningur um verð hluta skal það ákveðið með mati tveggja óvilhallra manna sem dómkvaddir skulu til þess starfa. Forkaupsréttarhafi hefur tveggja mánaða frest til að beita forkaupsrétti sínum og telst fresturinn frá tilkynningu til stjórnar um tilboð. Þá mega ekki líða fleiri en þrír mánuðir frá því að kaup voru ákveðin þar til kaupverð er greitt. Óheimilt er að veðsetja eða gefa hluti í félaginu án samþykkis félagsstjórnar.

7. gr.

Félagið má eigi veita lán út á hluti sína nema lög leyfi. Félaginu er heimilt að kaupa eigin hluti að því marki sem lög leyfa. Óheimilt er að neyta atkvæðisréttar fyrir þá hluti sem félagið á sjálft.

8. gr.

Hluthafi ber ekki ábyrgð á skuldbindingum félagsins fram yfir hlut sinn í félaginu.

III. Hluthafafundir

9. gr.

Æðsta vald í málefnum félagsins er í höndum lögmætra hluthafafunda.

10. gr.

Aðalfund félagsins skal halda fyrir lok ágúst ár hvert.

Aukafundi skal halda eftir ákvörðun stjórnar eða að kröfu kjörinna endurskoðenda eða hluthafa sem ráða a.m.k. einum tíunda hluta hlutafjár í félaginu. Skal krafan gerð skriflega og fundarefni tilgreint og fundur boðaður þá innan fjórtán daga. Ef stjórnin skirrist við að boða fund eftir móttöku slíkrar kröfu má leita atbeina stjórnvalda samkvæmt ákvæðum laga nr. 2/1995, um hlutafélög.

11. gr.

Félagsstjórn skal boða til hluthafafunda með tilkynningu til hvers hluthafa í ábyrgðarbréfi eða símskeyti eða á annan jafnsannanlegan hátt. Aðalfund skal boða eins og aðra hluthafafundi, með minnst sjö daga fyrirvara. Fundarefnis skal getið í fundarboði.

Hluthafafundur er lögmætur ef hann er löglega boðaður og hann sækja hluthafar eða umboðsmenn þeirra sem hafa yfir að ráða helmingi hlutafjár í félaginu að minnsta kosti. Verði fundur ólögmætur vegna annmarka að þessu leyti skal boða til nýs fundar innan mánaðar með sjö daga fyrirvara og verður sá fundur lögmætur til að ræða þau mál sem ræða átti á fyrri fundinum ef hann sækja hluthafar eða umboðsmenn þeirra sem ráða yfir 10% hlutafjár í félaginu hið minnsta.

Hluthafafundur kýs fundarstjóra og fundarritara. Fundargerðarbók skal haldin og í hana skráð það sem gerist á hluthafafundum.

12. gr.

Eitt atkvæði fylgir hverjum hlut. Hluthafar geta með skriflegu umboði veitt umboðsmönnum heimild til að sækja hluthafafund og fara með atkvæðisrétt sinn.

Á hluthafafundi ræður afl atkvæða nema öðruvísi sé fyrir mælt í lögum eða samþykktum þessum. Samþykki allra hluthafa þarf til þess:

a) að skylda hluthafa til að leggja fram fé í félagsþarfir fram yfir skuldbindingar sínar,

b) að takmarka heimild manna til meðferðar á hlutum sínum,

c) að breyta ákvæðum samþykktanna um hlutdeild manna í félaginu eða jafnrétti þeirra á milli

Tillögur um breytingar á samþykktum félagsins eða um sameiningu þess við önnur félög eða fyrirtæki má ekki taka til meðferðar á fundum þess nema þess hafi verið getið í fundarboði.

13. gr.

Á aðalfundi skulu tekin fyrir þessi mál:

1. Stjórn félagsins skal skýra frá hag þess og rekstri á liðnu starfsári.
2. Efnahagsreikningur og rekstrarreikningur félagsins fyrir liðið starfsár skulu lagðir fram ásamt athugasemdum endurskoðenda félagsins til samþykktar.
3. Stjórn félagsins skal kjörin og endurskoðendur.
4. Starfskjarastefna félagsins.
5. Tekin skal ákvörðun um hvernig fara skal með hagnað eða tap og um arð og framlög í varasjóð.
6. Ákvörðun skal tekin um greiðslur til stjórnarmanna fyrir störf þeirra á starfsárinu.
7. Umræður og atkvæðagreiðslur um önnur málefni sem löglega eru upp borin.

IV. Félagsstjórn

14. gr.

Stjórn félagsins skal skipuð eigi færri en þrem mönnum sem kosnir eru til eins árs í senn og einum til vara. Formann stjórnar skal kjósa sérstaklega en stjórnarmenn skipta að öðru leyti með sér verkum. Stjórn kýs varaformann.

Formaður boðar til stjórnarfunda. Hver stjórnarmaður getur krafist stjórnarfundar. Sama rétt á framkvæmdastjóri. Stjórnarfundir eru lögmætir ef meirihluti stjórnarmanna sækir fund. Afl atkvæða ræður afgreiðslu mála. Verði atkvæði jöfn ræður atkvæði formanns úrslitum. Halda skal fundargerð um stjórnarfundi.

Láti formaður stjórnar af störfum áður en kjörtímabili hans lýkur skal stjórn hlutast til um að boðað sé til hluthafafundar við fyrsta hentugleika þar sem kjörinn verður nýr formaður. Uns það kjör hefur farið fram skal varaformaður stjórnar gegna hlutverki formanns stjórnar.

15. gr.

Stjórn félagsins stýrir öllum málefnum félagsins milli hluthafafunda og gætir hagsmuna þess gagnvart þriðja aðila. Undirskriftir meirihluta stjórnarmanna skuldbinda félagið. Stjórn skal setja undirskriftarreglur fyrir starfsmenn félagsins að fenginni tillögu framkvæmdastjóra, þar sem fjallað skal um heimildir starfsmanna til að skuldbinda félagið.

Stjórnin skal setja sér starfsreglur þar sem nánar skal kveðið á um framkvæmd starfa hennar. Reglurnar skulu uppfylla skilyrði laga um fjármálafyrirtæki og skulu staðfestar af Fjármálaeftirlitinu.

16. gr.

Stjórn félagsins ræður framkvæmdastjóra sem fullnægir hæfisskilyrðum laga og ákveður starfskjör hans. Framkvæmdastjórar og þeir starfsmenn sem annast stýringu sjóða og eignasafna skulu hafa verðbréfaréttindi samkvæmt lögum um markaði fyrir fjármálagerninga.

Framkvæmdastjóri hefur með höndum stjórn á daglegum rekstri félagsins og kemur fram fyrir þess hönd í öllum málum sem varða venjulegan rekstur. Hinn daglegi rekstur tekur ekki til ráðstafana sem eru óvenjulegar eða mikilsháttar. Framkvæmdastjóri tekur ákvarðanir um heimildir einstakra starfsmanna til að skuldbinda félagið í samræmi við reglur þær sem stjórn setur samkvæmt 1. mgr. 15. gr.

Framkvæmdastjóri sér um reikningshald og ráðningu starfsliðs og ber að veita stjórnarmönnum og endurskoðendum allar upplýsingar um rekstur félagsins sem þeir kunna að óska og veita ber lögum samkvæmt.

17. gr.

Stjórnarmenn, framkvæmdastjóri, starfsmenn, endurskoðendur og hverjir þeir sem taka að sér verk í þágu félagsins eru bundnir þagnarskyldu um allt það sem þeir fá vitneskju um við framkvæmd starfa síns og varðar viðskipta- eða einkamálefni viðskiptamanna þess, nema skylt sé að veita upplýsingar samkvæmt lögum. Þagnarskyldan helst þótt látið sé af starfi.

18. gr.

Stjórn félagsins ber að sjá til þess að skipulagi félagsins sé þannig háttað að tryggð sé samfelld og regluleg starfsemi og þjónusta við viðskiptavini. Stjórn félagsins ber að setja félaginu reglur og verkferla sem tryggja að fyrirtækið, stjórn þess og starfsmenn fari að lögum og reglum sem um starfsemina gilda.

V. Reikningar og endurskoðun

19. gr.

Starfsár og reikningsár er almanaksárið. Stjórnin skal hafa lokið gerð ársreikninga og lagt fyrir endurskoðendur eigi síðar en einum mánuði fyrir aðalfund.

Á aðalfundi félagsins skal kjósa einn löggiltan endurskoðanda eða endurskoðunarfélag til eins árs í senn. Skal endurskoðandi rannsaka reikninga félagsins fyrir hver starfsár og leggja niðurstöður sínar fyrir aðalfund. Endurskoðendur má ekki kjósa úr hópi stjórnarmanna eða starfsmanna félagsins.

Endurskoðendur skulu hafa lokið endurskoðun ársreikninga eigi síðar en tveimur vikum fyrir aðalfund, ber þeim þá að senda hann til stjórnar félagsins ásamt athugasemdum sínum.

VI. Breytingar á samþykktum félagsins

20. gr.

Samþykktum þessum má breyta á lögmætum aðalfundi eða aukafundi með 2/3 hlutum greiddra atkvæða, svo og með samþykki hluthafa sem ráða yfir a.m.k. 2/3 hlutum af því hlutafé í félaginu sem farið er með atkvæði fyrir á fundinum, enda sé annað atkvæðamagn ekki áskilið í samþykktum eða landslögum, sbr. 93. gr. laga um hlutafélög.

VII. Slit og samruni

21. gr.

Um tillögur um slit og skipti á félaginu gilda ákvæði laga um fjármálafyrirtæki. Ákvörðun um slit og skipti er því aðeins gild að hún hljóti samþykki minnst 2/3 hluta greiddra atkvæða svo og samþykki hluthafa sem ráða minnst 2/3 hlutum þess hlutafjár sem farið er með atkvæði fyrir á fundi. Hluthafafundur sem tekið hefur löglega ákvörðun um slit eða skipti félagsins skal einnig ákveða ráðstöfun eigna og greiðslu skulda, sbr. þó ákvæði 98. og 99. gr. laga um fjármálafyrirtæki.

Um samruna félagsins við önnur félög, fer eftir ákvæðum laga um fjármálafyrirtæki og ákvæðum laga um hlutafélög.

VIII. Önnur ákvæði

22. gr.

Þar sem ákvæði samþykkta þessara segja ekki til um hvernig með skuli farið skal hlíta ákvæðum laga um fjármálafyrirtæki, laga um verðbréfasjóði, fjárfestingarsjóði og fagfjárfestasjóði, laga nr. 108/2007, um verðbréfaviðskipti, laga nr. 3/2006, um ársreikninga og laga um hlutafélög og ákvæðum reglugerða settum á grundvelli framangreindra laga.

• Útdráttur úr reglum Landsbréfa um hagsmunaárekstra
• Persónuverndarstefna Landsbréfa og reglur um upplýsingar um viðskiptavini
• Reglur fyrir endurskoðunarnefnd stjórnar Landsbréfa hf.
• Reglur fyrir starfskjaranefnd stjórnar Landsbréfa hf.
• Reglur Landsbréfa um hæfi og hæfismat lykilstarfsmanna
• Reglur Landsbréfa um flokkun viðskiptavina
• Reglur um stjórn og framkvæmdastjóra og starfsreglur stjórnar
• Siðasáttmáli og siðareglur Landsbréfa
• Stefna Landsbréfa um aðgerðir gegn fjármunabrotum
• Stefna Landsbréfa um ábyrgar fjárfestingar
• Stefna Landsbréfa um nýtingu á atkvæðisrétti tengdum fjármálagerningum í eigu sjóða félagsins
• Stefna Landsbréfa um sjálfbærni í rekstri sjóða
• Stefna og reglur Landsbréfa um meðferð kvartana
• Verklagsreglur um framkvæmd viðskiptafyrirmæla og bestu framkvæmd
• Almennir skilmálar um eignastýringu og fjárfestingarráðgjöf

Landsbréf hf. eru fjármálastofnun sem starfar sem rekstrarfélag verðbréfasjóða og sérhæfðra sjóða auk þess sem félagið hefur starfsleyfi til eignastýringar og fjárfestingarráðgjafar. Félagið starfar eftir mjög ítarlegu og umfangsmiklu regluverki. Hér að neðan eru hlekkir á helstu lög og stjórnvaldsfyrirmæli sem gilda um starfsemina, en hér er alls ekki um tæmandi talningu að ræða.

• Lög nr. 116/2021, um verðbréfasjóði
• Lög nr. 45/2020, um rekstraraðila sérhæfðra sjóða
• Lög nr. 115/2021, um markaði fyrir fjármálagerninga
• Lög nr. 161/2002, um fjármálafyrirtæki
• Lög nr. 140/2018, um aðgerðir gegn peningaþvætti og fjármögnun hryðjuverka
• Lög nr. 87/1998, um opinbert eftirlit með fjármálastarfsemi
• Reglugerð nr. 976/2021, um verndun fjármálagerninga og fjármuna viðskiptavina o.fl.
• Reglugerð nr. 472/2014, um samruna sjóða, skipan höfuðsjóða og fylgisjóða og tilkynningaraðferð
• Reglugerð nr. 970/2021, um fjárfestingarheimildir verðbréfasjóða og upplýsingagjöf
• Reglur nr. 1240/2020, um ársreikninga rekstrarfélaga verðbréfasjóða, rekstraraðila sérhæfðra sjóða og fjárfestingarsjóða
• Reglur nr. 353/2022, um eðlilega og heilbrigða viðskiptahætti, samskipti við viðskiptavini og meðhöndlun kvartana

Siðasáttmáli Landsbréfa byggir á siðareglum félagsins, almennri lýsingu á tilgangi þeirra og kafla um skyldur stjórnenda félagsins við starfsmenn. Siðasáttmálinn öðlast gildi þegar starfsmaður og framkvæmdastjóri Landsbréfa hafa undirritað hann og þar með staðfest sameiginlegan skilning á efni hans og mikilvægi.

Starfsmenn geta tilkynnt grun um brot á siðareglum óhræddir um stöðu sína. Ábending sem borin er fram í góðri trú hefur ekki neikvæða eftirmála fyrir viðkomandi starfsmann jafnvel þó grunur sé ekki á rökum reistur. Heimilt er að koma með nafnlausar ábendingar treysti starfsmenn sér ekki til að koma fram undir nafni. Það má gera með því að senda regluverði bréf með innanhússpósti. Landsbréf skulu sjá til þess að upplýsingum um hvaða starfsmaður upplýsti um misferli sé haldið leyndum.

Tilgangur

Siðareglur Landsbréfa eru grunnviðmið góðra viðskiptahátta og siðferðis starfsmanna Landsbréfa. Viðmiðin gilda um samskipti starfsmanna við viðskiptavini, samstarfsmenn, eftirlitsaðila, hluthafa, samkeppnisaðila og aðra sem eiga hagsmuna að gæta. Siðareglurnar eru einn af hornsteinum stefnu Landsbréfa og jafnframt leiðbeinandi um hvernig bregðast skuli við siðferðilegum álitamálum.

Siðareglurnar eiga við um alla starfsmenn Landsbréfa og einnig verktaka og umboðsmenn sem vinna fyrir félagið eða koma fram fyrir hönd þess. Siðareglur þessar mynda grunn að mannauðsstefnu, starfsreglum og verklagsreglum Landsbréfa.

Siðareglurnar eru skrifaðar frá sjónarhorni starfsmanna og lýsa því hvernig þeir vinna og koma fram. Þetta er gert til að árétta ábyrgð hvers og eins. Á starfsmönnum hvílir sú skylda að lesa siðareglurnar og fylgja þeim. Þó þær séu ekki tæmandi um dagleg störf, ætti hver og einn starfsmaður að temja sér að fylgja bæði bókstafnum og anda reglnanna og framar öllu að beita dómgreind sinni þegar álitaefni vakna. Þegar þörf krefur eiga starfsmenn að nýta þau úrræði sem félagið veitir til að ræða vafaatriði og álitamál.

Stjórnendur Landsbréfa helga sér siðareglurnar og skapa starfsmönnum aðstæður til að fylgja þeim.

Stjórn Landsbréfa hefur skuldbundið sig til að fylgja þessum reglum.

Skyldur stjórnenda

Framkvæmdastjóri og innra eftirlit Landsbréfa leggja höfuðáherslu á mikilvægi siðareglnanna og einnig á ábyrga stjórnarhætti.

Stjórnendur Landsbréfa sýna gott fordæmi og fylgja siðareglunum í hvívetna.

Stjórnendur þróa fyrirtækjamenningu sem gerir starfsmönnum kleift að tileinka sér og fjalla um siðareglurnar, takast á við siðferðileg álitaefni, spyrja spurninga og bera upp áhyggjuefni.

Óheimilt er að refsa starfsmönnum sem tilkynna í góðri trú um ætluð brot annarra.

Stjórnendur Landsbréfa skulu auðvelda starfsmönnum að fylgja eftir lögum og reglum og skulu þeir hafa forgöngu um setningu starfsreglna á vinnustað.

Siðareglur

1. Samfélagið

Við viljum taka þátt í að byggja upp samfélagið og njóta virðingar. Virðingu ávinnum við okkur með athöfnum okkar jafnt innan félagsins sem utan, þar sem við fylgjum leikreglum samfélagsins og temjum okkur heiðarleika, sanngirni, ráðvendni, hófsemd og varfærni.

Við erum staðráðin í að láta óréttmæta viðskiptahætti aldrei viðgangast. Það felur meðal annars í sér að tilkynna um ætluð brot til réttra aðila og taka þátt í innlendum og alþjóðlegum aðgerðum gegn svikum, spillingu, peningaþvætti og fjármögnun hryðjuverka- og glæpastarfsemi.

Við öxlum samfélagslega ábyrgð, lærum af öðrum og kynnum eftir atvikum hagsmunaaðilum þau góðu verk sem við vinnum svo þeir geti lært af okkar reynslu.

2. Viðskiptavinurinn

Við hlúum að viðskiptatengslum

Við hlustum á þarfir viðskiptavina og viljum ávinna okkur traust þeirra. Við tökum mark á athugasemdum og ábendingum viðskiptavina, lærum og bregðumst við þeim tafarlaust og á sanngjarnan hátt. Við úrlausn viðfangsefna höfum við hagsmuni viðskiptavina að leiðarljósi og leitum þeirra leiða sem henta þeim best.

Samskipti okkar við viðskiptavini eiga að helgast af heilindum þannig að hagur beggja sé tryggður.

Við bjóðum ekki verðmæti, gjafir eða annað sem túlka má þannig að það sé til þess að hafa áhrif á, laða að eða halda viðskiptum og tryggja óeðlilegan ávinning. Við skiljum að allar gjafir og fyrirgreiðsla frá viðskiptavinum til okkar, starfsmanna félagsins, geta orkað tvímælis. Við þiggjum því ekki gjafir, fyrirgreiðslu eða þjónustu sem haft geta áhrif á dómgreind okkar í starfi. Meðferð gjafa skal ávallt vera í samræmi við reglur Landsbréfa.

3. Vinnustaðurinn

Það er á ábyrgð allra starfsmanna að byggja upp góða liðsheild og starfsanda. Okkur er umhugað um samstarfsfólkið, viðskiptavinina og aðra sem hagsmuna eiga að gæta og við sýnum hvert öðru sanngirni og virðingu. Við erum umburðarlynd, tökum tillit til ólíkra sjónarmiða og leyfum hæfileikum hvers og eins að njóta sín til þess að auðga starf okkar og það samfélag sem við búum í.

4. Hagsmunaárekstrar

Við látum persónulega hagsmuni ekki hafa áhrif á störf okkar fyrir Landsbréf. Við misnotum ekki aðstöðu okkar til þess að afla okkur eða tengdum aðilum ávinnings. Við skiljum að hagsmunaárekstrar geta jafnt komið upp milli viðskiptavina og Landsbréfa, viðskiptavina og starfsmanna, starfsmanna og Landsbréfa og innbyrðis á milli viðskiptavina. Við beitum dómgreind okkar til þess að átta okkur á mögulegum hagsmunárekstrum og að koma í veg fyrir þá og förum í hvívetna eftir reglum Landsbréfa um varnir gegn hagsmunaárekstrum.

5. Fagmennska og heiðarleiki

Við vinnum ætíð störf okkar af fagmennsku og með virðingu fyrir viðskiptavinum, Landsbréfum og öðrum hagsmunaaðilum.

Við sýnum fagmennsku og heiðarleika með því að leita upplýsinga, fylgja lögum, reglum, starfsháttum, siðareglum og öðrum viðmiðum sem eiga við störf okkar hverju sinni.

Við þekkjum og ræðum siðferðileg álitamál sem snerta starf okkar.

Við sýnum fagmennsku og heiðarleika með því að gæta jafnræðis og með því að fjalla um mál viðskiptavina af nærgætni og trúnaði í anda þessara siðareglna.

6. Trúnaður

Við skiljum og virðum mikilvægi gagnsæis á fjármálamarkaði og fylgjum þeim lögum sem gilda um samkeppni og aðgang að upplýsingum. Við erum þó alltaf bundin þagnarskyldu um allt það sem við fáum vitneskju um í starfi sem varðar viðskipti eða einkamál viðskiptavina, nema skylt sé samkvæmt lögum að veita upplýsingar. Þagnarskyldan helst þó látið sé af störfum.

Við hagnýtum okkur ekki upplýsingar um viðskiptavini á annan hátt en þeim hefur verið kynnt, né veitum óviðkomandi aðgang að gögnum sem viðskiptavinir hafa trúað okkur fyrir.

7. Orðspor Landsbréfa

Okkur er ljóst að orðspor Landsbréfa er ein dýrmætasta eign félagsins. Okkur ber að efla það og varðveita til þess að vinna traust viðskiptavina og skapa góðan vinnustað. Það gerum við best með því að virða og fylgja siðareglunum auk þess sem við hlustum á, lærum af og þjónum viðskiptavinum.

Landsbréf leitast við að aðstoða viðskiptavini sína eftir bestu föngum með fagmennsku og sanngirni að leiðarljósi. Landsbréfa hafa sett sérstakar reglur um meðferð kvartana sem finna má undir reglur Landsbréfa. Ef viðskiptavinir Landsbréfa, sem og annarra fjármálafyrirtækja, vilja ekki una úrlausn sinna mála geta þeir ávallt borið ágreining varðandi viðskipti við fjármálafyrirtæki til Úrskurðarnefndar um viðskipti við fjármálafyrirtæki, sem vistuð er hjá Fjármálaeftirliti Seðlabanka Íslands. Erindum til úrskurðarnefndarinnar skal beint til nefndarinnar á neðangreint heimilsfang:

Úrskurðarnefnd um viðskipti við fjármálafyrirtæki
Kalkofnsvegur 1
101 Reykjavík
Tölvupóstur: [email protected] og nánari upplýsingar og eyðublöð má finna á vef Fjármálaeftirlits Seðlabanka Íslands.

Auk þess að geta borið ágreining undir úrskurðarnefndina geta viðskiptavinir borið málefni er varða neytendarétt undir Neytendastofu, samkeppnismál undir Samkeppniseftirlitið og að sjálfsögðu eiga viðskiptavinir ávallt rétt á að bera mál undir almenna dómstóla. Ef viðskiptavinir telja á rétt sinn hallað eru þeir hvattir til að leita sér aðstoðar lögmanns og má í því sambandi vísa til Lögmannafélags Íslands, en það rekur Lögmannavaktina sem veitir ókeypis lögfræðiráðgjöf fyrir almenning með það að markmiði að veita upplýsingar um réttarstöðu og hvert hægt er að leita eftir nánari úrlausn mála.